மருத்துவம்: ரத்த அழுத்தமா கவலைப்படாதீங்க ரெண்டு மிளகாய் சாப்பிடுங்க?!

Posted on ஓகஸ்ட் 13, 2010

12


இன்று ஒரு இருதயநலக் குறிப்பு:

மிகக்குறைந்த தூக்கம் உங்கள் இருதயத்துக்கு மிகவும் ஆபத்தானது. மிக அதிகமான தூக்கம் மனச்சோர்வு நோய்க்கான அறிகுறி! அதனால், உடலுக்கு ஆரோக்கியமான 6-8 மணி நேர அளவான தூக்கத்தை கடைப்பிடிக்க முயற்ச்சியுங்கள்!

ஜப்பான் நாட்டு உணவுகள்ல பொதுவா உப்பு, காரம், இனிப்புன்னு எல்லா சுவைகளுமே கொஞ்சம் குறைச்சலாதான் இருக்கும். வேலைப்பளு அதிகம் இருக்குறதுனால, நம்ம உணவு சமைச்சு சாப்பிட முடியாம பெரும்பாலும், பல்கலைக்கழக உணவகத்துல, ஜப்பான் நாட்டு உணவுகள சாப்பிடுறது வழக்கம். இப்படியே தொடர்ந்து சாப்பிட்டு நாக்கு செத்துப்போய், ஜப்பானிய நண்பர்கள்கிட்ட பேசிக்கிட்டு இருக்கும்போது, எங்க ஊருல நல்லா காரமா சாப்பிடுவோம்னு தெரியாத்தனமா சொல்லப்போக…..

“அடப்பாவமே அப்படியா? சரி, இப்போ என்ன உங்களுக்கு, நல்லா காரமாண உணவு வகைகள சாப்பிடனும் அவ்வளவுதானே” அப்படீன்னு சொல்லி ஒரு சீன நாட்டு உணவகத்துக்கு கூட்டிட்டு போனாங்க! சரி, நம்ம ஊரை விடவா காரமா இருந்துட போகுதுன்னு, வெளங்காத பேருல (அட, சீன மொழியில்ல அதாங்க!) ஏதோ நாலு உணவு அயிட்டங்கள சொன்னான் நம்ம சீன நண்பன்.

இதுவரைக்கும் எல்லாம் நல்லாத்தான போய்க்கிட்டு இருக்குன்னு நெனச்சிக்கிட்டு இருக்கும்போதே, காய்கறி உணவு அயிட்டம் ஒன்னு வந்தது. பக்கத்துல இருந்த நண்பர் உடனே, அடடே நீங்க ஆவலா எதிர்ப்பார்த்துக்கிட்டு இருந்த காரமான உணவு வந்துட்டுது, பூந்து வெளையாடுங்கன்னு சொன்னாரு! ஆனா பார்த்துங்க, சீன நாட்டு உணவு வகைகள்லேயே ரொம்ப ரொம்ப காரமான உணவு இதுன்னு ஒரு மேலதிக தகவலையும் வேற சேர்த்து சொன்னாரு!

சரி, நம்ம ஊரு காரத்தைவிடவா அதிகமா இருந்துடப்போகுதுன்னு நம்பி பார்த்தா, தம்மாத்தூண்டு வெங்காயத்தோட வெறும் பட்ட மிளகாயா (அதாங்க காய்ந்த மிளகாய்!) இருந்தது கிண்ணம் நிறைய?! அடப்பாவிகளா, என்னய்யா இது காரமான உணவு கேட்டா வெறும் காய்ந்த மிளகாயா கொடுத்து சாப்பிடச்சொல்றீங்களேன்னு அன்னிக்கு எடுத்த ஓட்டம்தான். இன்னிக்கு வரைக்கும் அந்த உணவகம் பக்கம் தல கூட வச்சிப் படுக்கலைன்னா பார்த்துக்கோங்களேன்!

“அதெல்லாம் சரி, இந்த கதைக்கும் (?) இந்தப் பதிவோட தலைப்புக்கும் என்ன சம்பந்தம்?” அப்படீன்னுதானே யோசிக்கிறீங்க? அட நிறைய இருக்குங்க…..

நான் போன அந்த உணவகத்தோட பேரு சிஷென் (Sichuan) உணவகம்! சிஷென் அப்படீங்கிறது, தென் சீனாவின் ஒரு பகுதி. மிளகாய் அதிகமாக சேர்த்து, உணவுவகைகள சமைத்து சாப்பிடக்கூடிய பழக்கமுள்ளவங்க அந்த பகுதி சீன மக்கள். அந்தப் பகுதியைச் சேர்ந்த ஒரு ஆய்வாளரின் சமீபத்திய ஒரு ஆய்வில், மிளகாய் அதிகமாக உண்டால் ரத்த அழுத்தத்தைக் கட்டுப்படுத்த முடியும்னு கண்டுபிடிக்கப்பட்டிருக்கு! அதப்பத்திதான் இந்தப் பதிவுல, இனி நாம விவரமா பார்க்கப்போறோம்…..

மிளகாய்-கேப்சைசினும், சில சாதகமான பின்விளைவுகளும்!

மிளகாய்க்கு காரத்தைக் கொடுக்கும் கேப்சைசின் (capsaicin) என்னும் ஒரு வேதியல் பொருளுக்கு ரத்த அழுத்தத்தைக் குறைக்கும் திறன் உண்டு என்பது முந்தைய சில ஆய்வுகள்மூலம் தெரிந்த செய்தியே! ஆனால், கேப்செய்சின் குறித்த இதுவரையிலான ஆய்வுகளில், மிகவும் அதிக அளவிலான, குறுகிய கால கேப்செய்சின் பயன்பாட்டினால் ஏற்படும் விளைவுகள் குறித்த, ஆனால் சர்ச்சைக்குறிய முடிவுகளே எட்டப்பட்டது என்றும், சமீபத்திய இந்த ஆய்வின்மூலம், நீண்ட காலமாய் உண்ணப்படும் மிளகாய் கலந்த உணவில் இருக்கும் கேப்செய்சின் அளவுகளால், ரத்த அழுத்தத்தைக் குறைக்க முடியும் என்று முதல்முறையாக கண்டறியப்பட்டுள்ளது என்கிறார், சீனாவின் மூன்றாவது ராணுவ மருத்துவ பல்கலைக்கழகத்தின் ஆய்வாளர் திரு. ஷிம்மிங் ஷு! (Zhiming Zhu of Third Military Medical University in Chongqing, China)

மிளகாயில் உள்ள கேப்செய்சின் என்னும் வேதிப்பொருள் எப்படி ரத்த அழுத்தத்தைக் குறைக்கும்?

ரத்த நாளங்களைச் சுற்றியுள்ள ஒருவகை புரதமான transient receptor potential vanilloid 1 (TRPV1) என்னும் புரதத்தை தூண்டும் கேப்செய்சின், நைட்ரிக் ஆக்சைடு என்னும் ஒரு வகை வேதியல் பொருளின் உற்பத்தியை அதிகரிக்கிறது. காற்று வடிவிலான இந்த வேதியல் பொருள் ரத்த நாளங்களில் ஏற்படும் காயங்களுக்கு எதிராக செய்ல்பட்டு ரத்த நாளங்களைப் பாதுகாக்கும் திறன் கொண்டது! மேலும் இந்த வினைகள் எல்லாம் சேர்ந்து, ரத்த நாளங்களைத் தளர்ச்சியடையச் செய்து, ரத்த அழுத்தத்தைக் குறைக்கின்றன என்கிறார் ஷிம்மிங் ஷூ!

ரத்தக் கொதிப்புள்ள எலிகளில் நடத்தப்பட்ட இந்த ஆய்வில், நீண்ட காலமாய் உண்ணப்படும் மிளகாய் கலந்த உணவிலிருக்கும் கேப்செய்சின் அளவுகளுக்கு ரத்த அழுத்தத்தைக் குறைக்கும் திறன் உள்ளது என்று கண்டறியப்பட்டாலும், இதே மாதிரியான ஒரு ஆய்வை, நீண்டகாலமாய் அதிகம் மிளகாய் கலந்த உணவுகளை உண்டுவரும், ஆயிரக்கணக்கான மக்களில் மேற்கொண்டு, இம்முடிவை  நிரூபிக்கவேண்டியது அவசியம் என்றும், ஆனால், அத்தகைய ஆய்வு ஒன்று நடத்தப்பட்டால் நிச்சயம் முடிவு ஒரே மாதிரியாகத்தான் இருக்கும் என்பதற்க்கு சாத்தியக்கூறுகள் இருக்கிறது என்கிறார் ஷூ!

அது எப்படி?

மிளகாய் கலந்த உணவுகளை அதிகம் உண்ணும் பழக்கமுள்ள மக்கள் வாழும், தென்சீன பகுதிகளான சிஷென், கோஷொ, யுன்னான், ஹூனான் மற்றும் சாங்கிங் ஆகிய பகுதிகளில் ரத்தக்கொதிப்புடன் வாழும் மக்கள் 10-14% என்றும், ஆனால் மிளகாய் அதிகம் சாப்பிடாத உணவுப்பழக்கவழக்கமுள்ள மக்கள் வாழும் வடகிழக்கு சீன பகுதிகளில் 20% என்றும் கூறுகிறார் ஷூ!

அதெல்லாம் சரிதான், ஒரு நாளைக்கு எத்தனை மிளகாய் சாப்பிட்டா ரத்த அழுத்தத்தைக் கட்டுப்படுத்தலாம்?

அதாங்க தெரியாது! அட, என்ன அப்படிப் பார்க்குறீங்க? அப்படீன்னு நான் சொல்லலீங்க. நம்ம ஷூ தான் சொல்றாரு. ஆமாங்க, ஒரு நாளைக்கு கேப்செய்சின் இருக்கும் எத்தனை மிளகாய் உண்டால் ரத்த அழுத்தத்தைக் குறைக்க/கட்டுப்படுத்த முடியும் என்பது குறித்து சரியான/திட்டவட்டமான ஒரு முடிவுக்கு வர, மேலும் ஆய்வுகள் செய்தால்தான் கண்டறிய முடியும் என்று சொல்கிறார் ஷூ!

“அடப் போங்கப்பா…., தங்கவேலு சமையல் கேக்குற எல்லாத்துக்கும், “ஓ…. தெரியுமே”ன்னு சொல்லிட்டு, சரி அடுத்து என்னன்னு கேட்டா…..அதாங்க எனக்குத் தெரியாதுன்னு சொல்ற அவர் மனைவி மாதிரியில்ல இருக்கு நம்ம ஆய்வாளர் ஷூ சொல்றது” அப்படீன்னு ஒன்னும் உணர்ச்சிவசப்படாதீங்க! கூடிய சீக்கிரமே நம்ம ஷூ, நாம எதிர்பார்க்குற அந்தக் கேள்விக்கான பதிலோட ஒரு ஆய்வறிக்கையை வெளியிடுவாருன்னு நம்புவோம்!

தொடர்புடைய சில பதிவுகள்:

ஆபத்து: மாரடைப்புக்கு பலியாகிக்கொண்டிருக்கும் இந்தியா!!

அதிர்ச்சி: ‘குள்ளமானவர்’களையே குறிவைத்துத் தாக்கும் ‘இருதய’ நோய்கள்?!

மரணத்தை வென்று புன்னகையுடன் ஹன்னா க்ளார்க்!

மூடிய இருதய அறுவை சிகிச்சையும் ஜீன் தெரபியும்!

இந்தப் பதிவு உங்களுக்கு பிடிச்சிருந்தா கீழுள்ள தொடர்பை அழுத்தி, (இன்ட்லி கணக்கு ஒன்றை தொடங்கியபின், பத்மஹரி பக்கத்தில்) பதிவுகளின் இடது பக்கத்தில் இருக்கும் vote எனும்  ஆரஞ்சு வண்ண பொத்தானை அழுத்தி இன்ட்லியில் ஓட்டு போடுங்க……., நன்றி!

ஓட்டுப் போடலையோ ஓட்டு

மேலிருப்பான் தளம் உங்களுக்குப் பிடிச்சிருந்தா இங்கே அழுத்தி உங்கள் ஆதரவை தெரிவியுங்கள். நன்றி!

Advertisements